သရုပ်ဆောင်နေမင်းနဲ့တူတစ်ဝမ်းကွဲတော်စပ်သူ အုပ်သာကျော် အနုပညာလောကထဲကို စတင်ဝင်ရောက်

၂၀၁၄ ဒီဇင်ဘာလလယ် အမေရိကားဘက်မှာ မော်လ်ဒယ်သွားပြိုင်ခဲ့ပြီး  အပြင်မော်လ်ဒယ်တစ်ယောက်အနေနဲ့ ရပ်တည်ခဲ့တဲ့ အုပ်သာကျော်က သရုပ်ဆောင်နေမင်းနဲ့တူတစ်ဝမ်းကွဲတော်စပ်တယ်လို့သိရပြီး ၂၀၁၅ အောက်တိုဘာလမှာ ကိုယ်ပိုင်တိုက်ဖြစ်တဲ့ ရွှေစင်ဦးထုတ်လုပ်ရေးနဲ့ ဗီဒီယိုရိုက်ကူးမှုတွေစတင်ရိုက်ကူးနေပြီမို့ လက်ရှိမှာ နှစ်ကားမြောက်ရိုက်နေတဲ့ အချစ်ရဲ့ အခြားစာမျက်နှာရှုတင်ကိုရောက်ရှိခိုက် သိချင်တာလေးတွေ မေးမြန်းဖြစ်ခဲ့ပါတယ်။

"အခုရိုက်နေတဲ့ကားလေးကအချစ်ရဲ့အခြားစာမျက်နှာတဲ့။ မင်းသမီးက စံရတီမိုးမြင့်ပေါ့။ ဒါရိုက်တာကကိုသားညီကျွန်တော့်ရဲ့ ဒုတိယမြောက်ကားပါ။ ဒီကားထဲမှာ ကျွန်တော်က ဆင်းရဲတယ်။ ချမ်းသာတဲ့မိန်းမတွေကိုမုန်းတယ်။ စာကြိုးစားတဲ့ ခပ်အေးအေးနေတတ်တဲ့ကျောင်းသားတစ်ယောက်ရဲ့ ကာရိုက်တာလေးပါ။ ပထမဆုံးကားလေးကတော့ ဗီလိန်ယောက္ခမဆိုတဲ့ကားပါ။ အဲ့ဒီကားလေးက ကိုရန်လေးရယ်၊ ရွှေမှုန်ရယ်၊ ကျွန်တော်ရယ်ပေါ့။ အဲ့ဒီထဲမှာ သာမန်ဝန်ထမ်းတစ်ယောက်၊ ချစ်သူကပိုက်ဆံရှိတဲ့မိန်းကလေးတစ်ယောက်ပါ။ ဒီကားပြီးရင်လဲ ဦးမီးပွားနဲ့ဗီဒီယိုတစ်ကားရိုက်ဖို့ရှိပါသေးတယ်။"လို့ သူက ပြောပြပါတယ်။

သရုပ်ဆောင်နေမင်းနဲ့အမျိုးတော်ဆက်ပုံကိုလဲ သူက "ဦးနိုင်နဲ့က တူတစ်ဝမ်းကွဲတော်ပါတယ်။ ကျွန်တော့်အဖေဖက်ကတော်တာပေါ့။ ကျွန်တော်အနုပညာအလုပ်စလုပ်ပြီး ခေါင်းဆောင်အနေနဲ့ ဇာတ်ကားတွေစမရိုက်ခင်မှာ ဦးနိုင်ကားတွေမှာ အတွေ့အကြုံရအောင် တစ်ကားစနှစ်ကားစမှာ ပါဝင်သရုပ်ဆောင်ခဲ့ပါတယ်။ ဦးနိုင်ရဲ့အကူအညီ၊ ဦးနိုင်ရဲ့ ပံ့ပိုးမှုတွေနဲ့အခုချိန်ထိ ဇာတ်ကားရွေးချယ်မှုတွေ၊ ဇာတ်လမ်းရွေးချယ်မှုတွေကိုလုပ်နေပါတယ်"တဲ့။

ဆက်လက်ကြိုးစားသွားမဲ့ အနုပညာရည်မှန်းချက်နဲ့ပတ်သက်ပြီး "ကျွန်တော်ဘယ်ကာရိုက်တာမဆို၊ ဘယ်ဇာတ်မဆို ရိုက်ပါတယ်။ အဓိကကမင်းသားတစ်ယောက်အနေနဲ့ကာရိုက်တာကျိုးသွားမှာ စိုးတယ်။ သရုပ်ဆောင်ကောင်း တစ်ယောက်ဖြစ်ချင်တဲ့အတွက် ကိုယ့်အတွက် အဆင်မပြေဘူးဆိုရင်တောင်ရအောင်ကြိုးစားပြီး လုပ်သွားမှာပါ။ ကျွန်တော်ရဲ့ အားနည်းချက်တစ်ခုက ဟာသဖက်တွေဆိုသိပ်မရချင်ဘူး။ လူကအပြင်မှာ အနေအေးတဲ့ အတွက်ကြောင့်လေ။ ဒါပေမဲ့ ကျွန်တော်ရအောင်ကြိုးစားပြီး သရုပ်ဆောင်ထားပါတယ်။ အခက်အခဲတွေကတော့ အများကြီးပဲ။ ဟာသကတော့ အဓိကခက်ခဲတယ်။ အသစ်လဲဖြစ်တဲ့အတွက် ခက်ခဲပေမဲ့ အများကြီးအဆင်ပြေတယ်။ တွဲဖက် သရုပ်ဆောင်တဲ့သူတွေကလဲ ကူညီပေးကြပါတယ်။ လာမဲ့ ၂၆ ရက်နေ့မှာ ၂၂ ပြည့်တော့မဲ့ အုပ်သာကျော် ကကားရိုက်နဲ့ပဲဖြတ်သန်းမှာပါ။ ဘာလို့လဲဆိုတော့ အဲ့ဒီနေ့က ဦးမီးပွားနဲ့ကားရိုက်ရှိတယ်ဆိုတော့လေ။ ပွဲတွေဘာတွေလုပ်ဖို့အစီအစဉ်မရှိပါဘူး"လို့ သူက ပြောသွားပါတယ်။