၂၀၁၆ ထဲမှာ လိင်ခွဲစိတ်မှုကို ခံယူတော့မယ်အကြောင်း ဖွင့်ဟလာတဲ့ မထက် ( Pop soul )
မြန်မာနိုင်ငံရဲ့ မိတ်ကပ် Artist တွေထဲမှာ လက်ရှိအအောင်မြင်ဆုံးသူတွေထဲက တစ်ယောက်ဖြစ်သလို ရင်သားခွဲစိတ်မှု ၊ လည်ချောင်းခွဲစိတ်မှု နဲ့များမကြာမှီ အချိန်ကာလအတွင်းမှာ လိင်ခွဲစိတ်မှုကို ခံယူတော့မယ့် မထက်နဲ့တွေ့ဆုံခိုက်
-Ar-T ပွဲလေးကို တက်ရောက်ဖြစ်ခဲ့ပုံလေးကိုအရင်ပြောပြပေးပါဦး။
ဟိုးအရင်ကတည်းက သူငယ်ချင်းလဲဖြစ်တယ်။ နောက် သူ့သီချင်းတွေကို အရမ်းကြိုက်တဲ့ သူ့ပရိသတ် တစ်ယောက်လဲဖြစ်တယ်။ အဲ့ဒီအတွက်ကြောင့် ဒီနေ့ပွဲလေးကို တက်ရောက်ဖြစ်တာပါ။
-အသံပြောင်းလိုက်တာရော ဘယ်လောက်ရှိသွားပြီလဲ။
အခုဆို ၈လလောက်တော့ရှိပြီပေါ့။
-အသံပြောင်းပြီးသွားတဲ့အချိန်မှာ ထူးခြားပြီးခံစားရတာရောရှိမလား။
အဓိကကတော့ ကိုယ်ကအလုပ်များတဲ့သူဖြစ်သလို နည်းနည်းစိတ်ကြီးတဲ့သူလဲဖြစ်တဲ့အတွက် ဆေးရုံကပေးထားတဲ့ စည်းကမ်းချက်တော်တော်များများတော့ မလိုက်နာနိုင်ဘူး။ အဲ့ဒီအတွက်ကြောင့် အသံအနေနဲ့ အပစ်ကလေးတွေ အများကြီးဖြစ်ခဲ့တယ်။ လက်ရှိရထားတဲ့ အသံလေးကိုလဲကျေနပ်ပါတယ်။ စလုပ်ကာစတုန်းက သုံးလအတွင်းမအော်ရဘူး။ ချောင်းမဆိုးရဘူး။ ဒါပေမဲ့ ၁၃ ရက်မြောက်တဲ့နေ့မှာပဲ ကိုယ်က အသားကုန်ခြစ်ပြီးအော်ပြီးသွားပြီ။ အဲ့ဒီတုန်းက အသံပျက်စီးသွားမယ်ထင်တာ ဒီလောက်အခြေအနေလေး ကျန်ခဲ့တဲ့အတွက် ဒါဘုရားပေးတာပဲပေ့ါ။ ကျေးဇူးတင်တယ်။
-နာကျင်မှုတွေရောရှိလား။
ခွဲတုန်းကတော့ နာကျင်မှုတွေရှိတယ်။ ဒါပေမဲ့ဆေးသောက်တဲ့အချိန် လည်ချောင်းထဲမှာ ဆေးဖြတ်သွားတဲ့ အချိန်တွေဆိုနာတယ်။ အဲ့ဒီလောက်ပါပဲ။ မထက်က အသက်ကြီးသွားတဲ့ အခါကျတော့ လုပ်ပြီး ပြန်ကောင်းဖို့အတွက်ကို အချိန်ယူရတယ်။ ၆လ တစ်နှစ်လောက်တော့ အချိန်ယူရမယ်ပြောတယ်။ ပုံမှန် အသက် နှစ်ဆယ်ကျော်ဆိုရင်တော့ ၄ လ ၅လလောက်အတွင်းကောင်းတယ်ပြောပါတယ်။ မထက်ဘန်ကောက် ရန်ဟီးဆေးရုံမှာပဲ လုပ်တာပါ။
-နောက်ထပ် လိင်ပြောင်းလဲဦးမယ်လို့လဲသိရပါတယ်။
လပိုင်းလောက်ပဲ လိုပါတော့တယ်။ မထက်အစီအစဉ်တွေရှိနေပြီ။ အကုန်လုံးလဲ စီစဉ်ပြီးနေပြီ။ ၂၀၁၆ ထဲရောက်သွားမယ်။ ဘာလို့လဲဆိုတော့ ဒီနှစ်က အလုပ်နည်းနည်းများနေလို့ပါ။ အစီအစဉ်ကဆွဲထားတာကြာနေပါပြီ။ ၂၀၁၆ ထဲမှာပြောင်းလဲပစ်ပါ့မယ်။
-ကိုယ့်ရဲ့ယောကျာ်းနဲ့ပတ်သက်တဲ့ အရာအားလုံးကို ပြုပြင်ပြောင်းလဲပစ်ရတဲ့ရည်ရွယ်ချက်လေးကိုလဲသိချင်ပါတယ်။
ဒါကတော့ ငယ်ငယ်လေးကတည်းက ကိုယ်ကြိုက်တာ ကိုယ်လုပ်မယ်။ ကိုယ်ဖြစ်ချင်တာကို ကိုယ်ဖန်တီးမယ်။ အဲ့ဒီစိတ်နဲ့ပဲ လုပ်ဖြစ်တာပါ။ ကိုယ်လေ့လာထားတယ်။ အဲ့ဒီလေ့လာမှုတွေအပေါ် ကို တစ်ခုချင်းစီ လိုက်ပြောင်းလဲကြည့်တာပေါ့။ ဒါတောင် အလုပ်မအားသေးလို့ပေါ့။ အလုပ်သာအားရင်ဒီ့ထက်အစောကြီး ကတည်းကပြောင်းလဲပစ်မှာပါ။
-မြန်မာနိုင်ငံမှာလဲ ဒီလို အရာတော်တော်များများကို ပြောင်းလဲပစ်တာက မထက်တစ်ယောက်တည်းရှိတယ်နော်။
ကိုယ်ဖြစ်ချင်တာ ကိုယ်လုပ်မယ်ဆိုတဲ့စိတ်တစ်ခုတည်းနဲ့ပဲလုပ်ဖြစ်တာပါ။
-ကိုယ့်ကိုဝေဖန်တိုက်ခိုက်တဲ့လူတွေရောမထက်မှာရှိနေမလား။
အပြည့်ပဲ။ အတိုက်အခိုက်ရော၊ အများကြီးပဲ။ ဒါပေမဲ့ မထက်ကတော့ ခေါင်းထဲမထည့်ဘူး။ ကိုယ်ဘာလုပ်ချင်တယ်။ ကိုယ်ဘာဖြစ်ချင်တယ်။ အဲ့ဒီလမ်းကြောင်းကိုပဲ ကိုယ်ကြည့်တယ်။ ဘာမှလဲသူများကို ပြန်မတုံ့ပြန်ဘူး။ ခံစားချက်လဲ မရှိဘူး။ ဘယ်လိုဝေဖန်မှုမျိုးကိုမှလဲခေါင်းထဲ မထည့်ဘူး။ ကိုယ့်ရဲ့အကောင်းအဆိုးကို ကိုယ့်ထက် နားလည်သူတွေ စီစဉ်ညွှန်ပြတာ၊ အကြံပေးတာရော၊ ကိုယ့်ရဲ့ကိုယ်ပိုင်ဥာဏ်နဲ့ရောတွေးခေါ်ပြီးမှပဲ ကိုယ့်လမ်း ကိုယ်လျှောက်တယ်။ ဘယ်လိုဝေဖန်မှုမျိုး၊ ဘယ်လိုတိုက်ခိုက်မှုမျိုး၊ ဘယ်လိုပြောဆိုမှုမျိုးကိုမှ ပြန်ပြီးတုံ့ပြန်မှာမဟုတ်ပါဘူး။
