တစ်ပွင့်နဲ့ ဗိုလ်လေး (လေဆိပ်လုံခြုံရေးရဲ) က လူသတ်သမားကို သေနတ်နဲ့ ပစ်လိုက်ရင် ကိုနေဝင်း မသေဘူး၊ ဟု ဂယက်ခက်

ရန်ကုန်လေဆိပ်နှင့် ပတ်သက်ဖူးသူ၊ ဝင်ထွက်ဖူးသူ အများစုသည် လေဆိပ် တက္ကစီမောင်းသူများကို နာမည်ဆိုးဖြင့်သာ မှတ်မိကြသည်။ ကားခ အဆမတန် ဈေးတောင်းသူ၊ ခရီးသည်တွေအပေါ် အမြတ်ထုတ်သူ၊ ကားတွေပိတ်ပြီး ခရီးသည်တွေ အလုအယက်ခေါ်သူ စသည့် အဆင်မပြေမှုတို့ဖြင့်သာ သူတို့ကို မှတ်မိကြသည်။ ထိုသို့ နာမည်ဆိုးဖြင့် သမုတ်ခံရခြင်းများကို လေဆိပ်တက္ကစီ ယာဉ်မောင်း တစ်ဦးဖြစ်သည့် ကိုနေဝင်းက ပြောင်းပြန် လှန်လိုက်ပြီး လူထု၏ အသိအမှတ်ပြုမှု များစွာကို သိမ်းပိုက်လိုက်နိုင်သည်။ ကိုးမီလီမီတာ ပစ္စတို သေနတ်ဖြင့် ရှေ့နေ ဦးကိုနီကို သတ်သူကို အုတ်ခဲကျိုး တစ်ပိုင်းဖြင့် ခုခံဖို့ ကြိုးစားရင်း အသက် ပေးသွားခဲ့သည်။ သူ၏ အသက်ကိုစွန့်ပြီး သေနတ်သမားကို ဟန့်တားနိုင်မှုမှာ လုပ်ကြံသူကို ဖမ်းမိနိုင်ရေးအတွတ် အထောက်အကူ ကြီးမားစွာ ဖြစ်ကြောင်းလည်း ဝိုင်းဝန်း ဖမ်းဆီးခဲ့သူ ရန်ကုန်လေဆိပ် တက္ကစီမောင်းသူတို့က ပြောသည်။ သို့သော် သူကား မကြားနိုင်တော့။ သူနေထိုင်ရာ ၁၅ ပေ ပတ်လည် သွပ်မိုး ပျဉ်ထောင်နေအိမ်ထဲ လူတွေက အပြည့်၊ ဘုရားစင်ဘေး နံရံထောင့်ရှိ စားပွဲခုံသေး တစ်လုံးပေါ် ထောင်ထားသည့် သေဆုံးသူ ကိုနေဝင်း၏ ဓာတ်ပုံအနီး ဇနီးဖြစ်သူက ငိုကြွေးလျက် အားပေးစကား လာပြောသည့် ဧည့်သည်များနှင့် တွေ့ဆုံနေသည်။ “သူ သေနတ်နဲ့ ပစ်မခံရခင် ကျွန်မက ဈေးလိုက်ပို့ဖို့ ဖုန်းဆက်ခေါ်ခဲ့တယ်၊ သူက ကားဆွဲဦးမယ်၊ လိုက်မပို့တော့ဘူး ပြောတာကြောင့် ကျွန်မဘာသာ ဆိုင်ကယ်နဲ့ ဈေးသွားခဲ့တယ်၊ ဈေးရောက်ရောက်ချင်း သူ သေနတ်နဲ့ ပစ်ခံရတယ် သတင်း ကြားမိလို့ ဆေးရုံအမီ ပြေးလိုက်ပေမယ့် အသက် မမီလိုက်ဘူး”ဟု မျက်ရည်များ ရွှဲနစ်လျက် လူမမည် ကလေးသုံးယောက် မိခင် မစုသက်ခိုင်က ပြောသည်။ ဆီးစပ်တွင် ရရှိခဲ့သော ကျည်ဒဏ်ရာဖြင့် သေဆုံးခဲ့သူ အသက် ၄၈ နှစ် ကိုနေဝင်း(ခ) ကိုဝင်းလွင်မှာ ဇန်နဝါရီလ ၂၉ ရက် ညနေပိုင်းက ရန်ကုန်လေဆိပ်တွင် အမျိုးသား ဒီမိုကရေစီ အဖွဲ့ချုပ် (NLD) မှ ဥပဒေအကြံပေး တရားလွှတ်တော်ရှေ့နေ ဦးကိုနီအား သေနတ်နှင့် အနီးကပ် ပစ်ခတ်လုပ်ကြံခဲ့သူ ကြည်လင်းကို ဝင်ဖမ်းရာမှ ပစ်သတ်ခံရသူ ဖြစ်သည်။ “ကိုနေဝင်းက စိတ်ရင်းကောင်းတယ်၊ မဟုတ်မခံ စိတ်ရှိပြီး တစ်ဖက်သားအပေါ် ကူညီတတ်သူ တစ်ယောက်ပါ၊ သူ့ရှေ့မှာ အမြင်မတော်တာ တွေ့ရင် ဝင်ကူညီတတ်တယ်၊ ရန်ပွဲတွေ့ရင် ဝင်ကူဆွဲလို့ ထိုးခံရတာလည်း အကြိမ် မနည်းဘူး၊ နေရာတကာ ဝင်မပါနဲ့ ဓားထိုးခံရမယ်လို့ ကျွန်မတို့က သူ့ကို သတိပေးဖူးတယ်၊ ဒီလို သေနတ်နဲ့ ပစ်သတ်ခံရမယ် အထိတော့ မတွေးမိဘူး”ဟု သေဆုံးသူ ကိုနေဝင်း၏ မရီးတော်စပ်သော မပန်းအိမွန်က ဆိုသည်။ မွေးချင်းပေါက် သားလေးယောက်တွင် တတိယမြောက် သားဖြစ်သူ ကိုနေဝင်းမှာ လွန်ခဲ့သည့် ကိုးနှစ်က မစုသက်ခိုင်နှင့် အိမ်ထောင်ကျပြီး သားသုံးဦး ထွန်းကားခဲ့သည်။ ရန်ကုန်လေဆိပ်ဝင်းတွင် အငှားယာဉ် မောင်းနေသည်မှာ တစ်နှစ်နီးပါး ရှိခဲ့ပြီး လုပ်ဖော်ကိုင်ဖက်များအပေါ် အမြဲစနောက်၍ ပျော်ပျော်နေတတ်သူဖြစ်ကြောင်း ယင်းလေဆိပ်ဝင်းရှိ အငှားယာဉ်မောင်းများက ဆိုသည်။ “တစ်ပွင့်နဲ့ ဗိုလ်လေး (လေဆိပ်လုံခြုံရေးရဲ) က လူသတ်သမားကို သေနတ်နဲ့ ပစ်လိုက်ရင် ကိုနေဝင်း မသေဘူး၊ ဦးကိုနီကို သေနတ်နဲ့ ပစ်လိုက်ချိန် ကျွန်တော်နဲ့ ယာဉ်မောင်း တစ်ယောက်ရယ် Capital 1 မှာ တာဝန်ကျနေတဲ့ တစ်ပွင့်နဲ့ ဗိုလ်လေးရယ် အနားမှာ အတူရှိနေတာ လူသတ်သမားနဲ့ ၁၅ ပေလောက်ပဲ ကွာတယ်၊ ဗိုလ်လေးက ခါးကြားက သူ့သေနတ်နဲ့ ထုတ်ချိန်တော့ လူသတ်သမားက သေနတ်နဲ့ ပြန်ချိန်ပြီး ငါ့ကိုပစ်ရင် မင်းကို ပြန်ပစ်မှာလို့ ပြောတယ်၊ ဗိုလ်လေးက လက်တွေ တုန်နေတာ လူသတ်သမားရဲ့ အောက်ပိုင်းကို သေနတ်နဲ့ မပစ်ဘူးဗျာ၊ ကျည်ပဲ မရှိတာလား၊ မပစ်ရဲတာလားမသိဘူး၊ ဗိုလ်လေးက ပြန်လှည့်ထွက်သွားတယ်၊ သတင်း သွားပို့တာ ဖြစ်မယ်၊ တကယ်လို့ သူသာ လူသတ်သမားကို ပစ်ခဲ့ရင် ကိုနေဝင်း မသေဘူး”ဟု လူသတ်သမားကို ဖမ်းဆီးစဉ် ပါဝင်ခဲ့သူ လေဆိပ်ဝင်းမှ အငှားယာဉ်မောင်း ကိုသီဟက ရှင်းပြသည်။ ကိုသီဟမှာ ယင်းနေ့ညနေက လေဆိပ်ဝင်းတွင် ယာဉ်ငှားမည့် ခရီးသည်စောင့်နေစဉ် ရှေ့နေ ဦးကိုနီ (ယခုမှ ဦးကိုနီမှန်း သိခဲ့သူ)အား ကားငှား မလားဟု မေးမြန်းခဲ့ကြောင်း၊ ဦးကိုနီက မငှားကြောင်း ခေါင်းခါပြသဖြင့် အခြား ခရီးသည်များဘက် လှည့်ကြည့်နေစဉ် ဒိုင်းဟု မြည်သံကြားပြီးနောက် ဦးကိုနီမှာ ကလေးငယ်ကို ချီလျက် မြေပြင်ပေါ်သို့ လဲကျခဲ့ကြောင်း ၎င်းက ဆိုသည်။ “သွေးတွေ ခေါင်းပေါ်မှာ ဖွာထွက်သွားပြီး ဦးကိုနီက လဲကျသွားတာ၊ လူသတ်သမားက ထွက်ပြေးချိန် ကျွန်တော်နဲ့ အငှားယာဉ်မောင်းက ဖိနပ်ချွတ်ပြီး သူ့လိုက်ဖမ်းတယ်၊ သူက သေနတ်နဲ့ ပစ်ပြေးတယ်၊ လေဆိပ် အောက်ပတ်လမ်းဘက် သူက ဆင်းပြေးရင်း ကိုနေဝင်းရှိတဲ့ ကားပါကင်နား အရောက်မှာ သူ့လက်ထဲက သေနတ်ကို လွယ်အိတ်ထဲ ထည့်လိုက်တယ်၊ ဒါကို ကိုနေဝင်းက မမြင်လိုက်ဘူး၊ ခဲကိုင်ပြီး ကိုနေဝင်းက ထွက်လာတော့ ကျွန်တော်က ကိုနေဝင်းကို သူ့အနားမကပ်နဲ့ သေနတ်ပါတယ် လှမ်းအော်တာ၊ ဒါပေမဲ့ မမီလိုက်ဘူး၊ ဟိုလူက သေနတ်နဲ့ ပစ်လိုက်တာ သူ့ဆီးစပ်မှန်သွားတယ်”ဟု ကိုသီဟက ရှင်းပြသည်။ သေနတ်ပစ်ခတ်သူ အမျိုးသားမှာ အငှားယာဉ်တစ်စီးကို သေနတ်ဖြင့်ချိန်၍ ယာဉ်ပေါ်တက်စဉ် လိုက်ဖမ်းသည့် အငှားယာဉ်မောင်းအဖွဲ့မှ တစ်ဦး၏ ပစ်လိုက်သည့် ရွှံ့ခဲမှာ ၎င်း၏ မျက်နှာကို ထိမှန်ချိန် ကျန်လူများက ဝင်လုံးထွေးကာ သေနတ် လုယူခဲ့ကြောင်း၊ ယင်းနောက် ၎င်းကို ဝိုင်းထိုးကြိတ် ကန်ကျောက်နေစဉ် ရဲတပ်ဖွဲ့က ရောက်ရှိလာပြီး မိုးပေါ် သေနတ်နှစ်ချက် ပစ်ဖောက်၍ လူစုခွဲခဲ့ကြောင်း ရန်ကုန်လေဆိပ်ရှိ အငှားယာဉ်မောင်းများထံမှ သိရသည်။ ကျည်မှန်ဒဏ်ရာဖြင့် သေဆုံးခဲ့သော ကိုနေဝင်းမှာ မြောက်ဥက္ကလာပမြို့နယ်၊ ခြောက်ကွေ့ မှတ်တိုင်အနီး နေထိုင်သည့် ဖီဒါ အငှားယာဉ် ပိုင်ရှင်ထံမှ လပေးဖြင့် ယာဉ်ယူမောင်းနေသူဖြစ်ပြီး အခမဲ့ယာဉ်များ မြို့တွင်းပြေးဆွဲစဉ် ဝင်ရောက် ကူညီခဲ့သူလည်း ဖြစ်သည်။ ယင်းအပြင် လေဆိပ်မှ မြို့ထဲသို့ အငှားယာဉ် လိုက်ပါရသည့်အခါ အပြန်ခရီးတွင် ကိုးမိုင်အထိ ခရီးသွားလာမှု အဆင် မပြေသူများကို အခမဲ့ယာဉ်ပေါ်သို့ တင်ဆောင်ပြီး ပို့ဆောင်ပေးနေသူလည်း ဖြစ်ကြောင်း ၎င်း၏ လုပ်ဖော်ကိုင်ဖက် ယာဉ်မောင်းများက ဆိုသည်။ အငှားယာဉ်မောင်း ကိုနေဝင်း၏ ဝင်ငွေဖြင့် ဇနီးနှင့် လူမမည်ကလေးငယ် သုံးဦးမှာ မှီခိုရပ်တည်နေရသည်။ ရှေ့နေ ဦးကိုနီ လုပ်ကြံခံရမှုမှ တရားခံကို အသက်ပေး ဖမ်းဆီးခဲ့သူ ကိုနေဝင်း နေထိုင်ရာ မင်္ဂလာဒုံမြို့နယ်၊ ကြံခင်းစုရပ်ကွက်၊ မြတောင်ညို(၁)လမ်းရှိ သူနေထိုင်ရာ နာရေးအိမ်တွင်တော့ အားပေးသူ၊ ကူညီ ထောက်ပံ့ပေးသူများနှင့် သတင်းမေးသူများက ပြည့်နေသည်။ ဧည့်သည်များ အကြားတွင်တော့ တီးတိုး စကားသံများ ပျံ့နှံ့နေသည်က သူရဲကောင်းဆန်စွာ ကောင်းသော သေခြင်းတရားဖြင့် အသက်ဆုံးရှုံးခဲ့သူ ဟူသတည်း။ The voice